Əli Məmmədov

Əli Fərhad oğlu Məmmədov Naxçıvanda anadan olub. 7 yaşından etibarən boks və şərq əlbəyaxa döyüş idman növü ilə məşğul olub. Boks üzrə Naxçıvan şəhər birliyində 1-ci yerə layıq görülüb (1979). 2 qat Azərbaycan çempionu olub (1980, 1981). Ə.Əzimzadə adına Dövlət Rəssamlıq Məktəbində təhsil alıb (1985-1989). 1989-cu ildə usta rəssam ixtisası üzrə Cəfər Cabbarlı adına “Azərbaycanfilm” kinostudiyasına cizgi filmləri sexinə təyinat alıb. Sonra qrim ustası işləyib. 1990-cı ildə tövsiyyə əsasında Qırgızıstanda yerləşən kaskadyorlar assosiasiyasına göndərilib. Döyüş və at üstündə yüksək səviyyədə təlimlər keçib, peşəkar kaskadyor lisenziyası alıb. Qırğıstandan qayıtdıqdan sonra “Azərbaycanfilm”də tryuk quruluşçusu və kaskadyor kimi filmlərdə çalışmağa başlayıb. Xarici film istehsalçılarının “Məleykələr” (1990 / İran) filmində kaskadyor, “Dağıdılmış körpülər” (1996, rejissor Rafiq Puya / ABŞ) filmində aktyor, tryuk quruluşçusu, kaskadyor, “Dronqo” (2002, rejissor Zinoviy Royzman / Rusiya) serialında tryuk quruluşçusu, kaskadyor, “Qraf Krestofski” (2004, rejissor Ramiz Fətəliyev / Rusiya) serialında tryuk quruluşçusu, kaskadyor, “Dənizçi” (2007 / Rusiya) filmində kaskadyor, “Silah” (2008, rejissor Aleksandr Kasatkin / Rusiya) serialında tryuk quruluşçusu, kaskadyor kimi çalışıb. Bir çox musiqi kliplərində, reklamlarda tryuk quruluşçusu və ifaçısı olub. Azərbaycan Kaskadyorlar Assosiasiyasının sədridir. Əməkdar mədəniyyət işçisidir (2009).